Keeda

meanings: aitbaar-trust; intezaar-to wait; ikhtiyaar: power.

Phoolon ki pankhudiyon mein ghoomte hue ek keeda hai,

Aur ek mere dimag ke chakkaro mein ghoom raha hai,

Khaate hue,

Har ek kona,

Jaha rakha hai,

Aitbaar, Intezaar aur Ikhtiyaar.

Aitbaar se usse milta hai,

Asaani se behak jaana,

Baaton mein aakar,

Khud ko bhool jaana,

Fir aisa badalna,

Ki bas badal jaana,

Fir kabhi aitbaar na dikhaana.

Intezaar se usse milta hai,

Laazmi hokar behak jaana,

Aisa rukna ki bas ruk jaana,

Ek ajeeb sa thehraav paana,

Ki bhool jaana,

Ki intezaar mein hai.

Ikhtiyaar se usse milta hai,

Fizool mein behak jaana,

Aise nashe mein jhoom jaana,

Jaise afeem chakh liya ho.

Aur ussi nashe mein udna,

Jaise waqt ka antt hi na ho.

Pankhudiyon mein keeda bhi,

Phool par aitbaar kar khush hai,

Uss badlaav par khush hai,

Jo intezaar ke saath,

Usse aise nashe mein,

Jhoomne par majboor karega ki,

Ikhtiyaar usse apne saare wajood par hoga,

Ek keede se ek titli tak ke thehraav mein hoga,

Ek khwaab se ek shayari tak ke intezaar mein hoga.

special mentions to the muse & bftb.