Woh Taara

Aasmaan ki uss taare ki tarah,

Mehsoos ho raha hai,

Jo saare taaro se door,

Chamak toh raha hai,

Par asal mein apni aakhri saanse le raha hai,

Marr sa raha hai,

Bujh sa raha hai,

Par tim-tima raha hai,

Aur soch raha hai,

Shayad, shayad,

Koi toh usse dekh raha hoga,

Yeh saare taaro ke beech,

Koi toh usse bhi baat kar raha hoga,

Yeh saari duniya ki matlabi baaton ke beech,

Koi toh usse bhi dil ki kahaani suna raha hoga,

Apna gham baant raha hoga,

Shayad, shayad.

Chamak toh hai,

Par roshni aaj thodi kam si hai,

Aag toh hai,

Thodi hai, thodi aur ki zarurat hai,

Aas toh hai,

Ehsaas ki umeed hai.